പൂമരം

ഇലയില്ലാത്ത
തണ്ടില്ലാത്ത
മുള്ളില്ലാത്ത
ജീവനില്ലാത്ത
എത്ര എത്ര
പൂമരങ്ങളാണ്
നമുക്കീനാട്ടിൽ

നൂറു നൂറ്
അമ്മമാരുടെ
കണ്ണുനീരിനാൽ
തഴച്ചു വളർന്ന
ചുടുചോര
നിറമുള്ള
പൂമരങ്ങൾ

നട്ട്
നനച്ച്
വളർത്തി
വലുതാക്കി
കായായി
പൂവായി
വളരാൻ
കാലമെടുക്കും

ക്ഷമയോടെ
അങ്ങനെ ഒരു പൂമരം
നട്ട് വളർത്താൻ
ആർക്ക് നേരം

അതിലും
എത്രയോ എളുപ്പം
ജീവനില്ലാത്ത
ചുവന്ന
പൂമരങ്ങൾ
ഉണ്ടാക്കാൻ

ആഞ്ഞു പതിക്കുമ്പോൾ
തെറിക്കുന്ന ആദ്യ ചോരയിൽ
വിത്ത്‌ പാകാം

ജീവന് വേണ്ടി കരയുമ്പോൾ
വീണ്ടും ഏൽക്കുന്ന വെട്ടിൽ
ഏതകലത്തിലും  ഒരമ്മയുടെ
ഹൃദയം കൂടി പിളർന്ന് രണ്ടാകും

ഉടലും തലയും
രണ്ടായാൽ
ചോര തേച്ച് മിനുക്കി
ഇലകളും
തണ്ടും മുള്ളും ഇല്ലാത്ത
പൂമരം നാട്ടാം
ചോരവീണ മണ്ണിൽനിന്നും
സാക്ഷികളായി 
മണ്ഡപങ്ങളായി 
ജീവനില്ലാത്ത പൂമരങ്ങൾ ...

(വേണ്ടാത്ത പൂമരങ്ങൾ )