എറിഞ്ഞുടയ്ക്കാൻ
കഴിയാത്ത
ആയിരം മോഹങ്ങൾതൻ
തേൻ കുടങ്ങളെൻ നെഞ്ചിൽ
തിരയിലിളകി നീ
മെല്ലെയകലുമ്പോൾ
ഒരു തീരാ നോവായെൻ
നെഞ്ചോട് ചേരുന്നു നീ
അകലുന്നുനീ യൊരു
പായ് വഞ്ചിയിലെങ്കിലും
അറിയുന്നു ഞാൻ
ചന്ദന ശോഭപോലെന്നെ
തഴുകുന്ന നിൻ മിഴികളെ
വീഴ്ത്താതെ നീ തൂവുന്ന
കണ്ണുനീരോ തുഴയോ
പുഴയിലെയീ കുഞ്ഞോളങ്ങൾ
കാണാം നമുക്കാ
സാഗരങ്ങൾക്കപ്പുറം
വിഷാദം കരഞ്ഞ് തീർത്ത്
മയങ്ങുന്ന കണ്ണുകൾക്ക്
കുളിരായി
അറിയാം നമുക്കന്ന്
പൊഴിഞ്ഞുപോയ
പ്രണയത്തിൻ തേനൂറും
അഭിലാഷങ്ങൾ
കരുതലായി നിൻ കൈപ്പടയിലൊരു
മുത്തമായൊരു കാലത്തെയാകെ
ഞാനെൻ നിശ്വാസത്തിലൊളിപ്പിക്കാം
ഒരുമിച്ച് തിരയാം
പിന്നിട്ട വഴികളിൽ
കുറിച്ചിട്ട വരികളെ
നമുക്കാ പൊഴിഞ്ഞുവീണ
പൂവിതളുകളിൽ
കാതങ്ങൾക്കപ്പുറം
ചെവിയോർത്തിരിക്കുന്ന
നീയാണീയക്ഷരങ്ങൾ
താഴ്വര താണ്ടിയ പൂങ്കാറ്റെ
കണ്ണിമ വെട്ടാതെയൊരുമൃദു
സംഗീതമായുണർത്തണേ
പറയണേ തിരയിലിളകി
മെല്ലെയകലുമാ തോണിയോടൊരു
കാലമാകെ കയ്യിലൊതിക്കി
കൂടണയാതലയുന്നീ
തേൻ കുടങ്ങൾതൻ മനോരാജ്യം .
