കുടുംബം

ജീവിതം
വിട്ടുവീഴ്ചകളും
അഡ്ജസ്റ്മെന്റുകളും
നിറഞ്ഞതാണെന്ന്
കേട്ടപ്പോൾ ഇത്രയും 
കരുതിയില്ല

ഓരോ തവണയും
മരണത്തിൽ നിന്നുള്ള
തിരിച്ചു വരവ് പോലെ
ഭയാനകമാകുന്നു ഓരോ
അഡ്ജസ്റ്മെന്റുകളും

കരിങ്കൽ ഹൃദയവുമായി
വേണം ജീവിതത്തിലേക്കിറങ്ങാൻ
എന്ന് തോന്നുന്നു
എന്നാൽ വേഗം വേഗം
അഡ്ജസ്റ്റ്മെന്റുകൾ നടത്തി
കരകയറി പുതിയ വേഷങ്ങൾ
അഭിനയിച്ച് തകർക്കാൻ കഴിയും

നാട്യങ്ങളും അഭിനയങ്ങളും
വശമില്ലാത്ത ലോല ഹൃദയങ്ങൾ
ഓരോ വീഴ്ചയിൽ നിന്നും
കരകയറാൻ സമയമെടുക്കും

അവർക്കോരോ അട്ജസ്റ്റ്റ്മെന്റും
ഓരോ മരണങ്ങളാണ്

വിട്ടു വീഴ്ചകൾ
അടക്കം ചെയ്യുന്ന
ശവക്കുഴികൾക്ക് മേൽ
ഉയർന്നു വരുന്ന മീസാൻ കല്ലുകളാണ്
കുടുംബം എന്ന സ്ഥാപനം ,

എത്ര ആഴത്തിലാണോ
വിട്ടുവീഴ്ചകൾ
അടക്കം ചെയ്യപ്പെടുന്നത്
അത്രയും ഭംഗിയായി മീസാൻ കല്ലുകൾ
മുകളിലേക്ക് ഉയർന്ന് വരും -
സമൂഹം അതിനെ
കെട്ടുറപ്പുള്ള കുടുംബം എന്ന് വിളിക്കും

ഓരോ മീസാൻ കല്ലുകൾക്കും
താഴെ - ദാമ്പത്യത്തിലെ ലോല ഹൃദയങ്ങൾ
അടക്കപ്പെട്ട ശവക്കുഴികളാണ് .

മീസാൻ കല്ലുകളെ മേലേക്കുയർത്താൻ
ബലിയായി താഴേക്ക്‌ താഴുന്നവരെ
ആ മരണത്തിൽനിന്നും കരകയറ്റുന്നത്
ശവകുഴികൾക്ക് മേൽ പറിച്ച് കുത്തിയ
ചെടികളിൽ വിരിഞ്ഞ പൂക്കളാണ്
ദാമ്പത്യ വല്ലരിയിൽ വിരിയുന്ന പൂക്കൾ
എന്ന് പറയപ്പെടുന്ന കുട്ടികൾ -

വിട്ടു വീഴ്ചകൾ
അടക്കം ചെയ്യുന്ന
ശവക്കുഴികൾക്ക് മേൽ
ഉയർന്നു വരുന്ന മീസാൻ കല്ലുകളാണ്
കുടുംബം എന്ന സ്ഥാപനം .

നടുമുറ്റം

കുട്ടികൾക്കോടിക്കളിക്കാൻ
എന്തിനാണിത്ര വിലപിടിപ്പുള്ള
നടുമുറ്റം

ഒരു മൂവ്വാണ്ടൻ മാവിന്
കൊല്ലത്തിലൊരിക്കൽ
പൂത്തു കായ്ച്ച് മാമ്പഴം
വീഴ്ത്താൻ
എന്തിനാണിത്ര വിലപിടിപ്പുള്ള
നടുമുറ്റം

സെന്റിന് മൂന്നും നാലും ലക്ഷമാ വില
അയ്‌ നാല് ഇരുപത് -
ഇരുപത് ലക്ഷത്തിന്റെ നടുമുറ്റം
അവിടെയാ പുള്ളാരുടെ ഒരോടിക്കളി

പോകിനെടാ പുള്ളാരെ
പെരക്കാത്തേക്ക്

ന്യൂ ജനറേഷൻ തന്തക്ക്
പുള്ളാരുടെ
ബാല്യത്തിന് വിലയിടേണ്ടി വന്നു
ഇരുപതു ലക്ഷം -
നടുമുറ്റത്ത് മറ്റൊരു വീടുയർന്നു
ബാല്യം പുരക്കകത്തൊതുങ്ങി .