നടുമുറ്റം

കുട്ടികൾക്കോടിക്കളിക്കാൻ
എന്തിനാണിത്ര വിലപിടിപ്പുള്ള
നടുമുറ്റം

ഒരു മൂവ്വാണ്ടൻ മാവിന്
കൊല്ലത്തിലൊരിക്കൽ
പൂത്തു കായ്ച്ച് മാമ്പഴം
വീഴ്ത്താൻ
എന്തിനാണിത്ര വിലപിടിപ്പുള്ള
നടുമുറ്റം

സെന്റിന് മൂന്നും നാലും ലക്ഷമാ വില
അയ്‌ നാല് ഇരുപത് -
ഇരുപത് ലക്ഷത്തിന്റെ നടുമുറ്റം
അവിടെയാ പുള്ളാരുടെ ഒരോടിക്കളി

പോകിനെടാ പുള്ളാരെ
പെരക്കാത്തേക്ക്

ന്യൂ ജനറേഷൻ തന്തക്ക്
പുള്ളാരുടെ
ബാല്യത്തിന് വിലയിടേണ്ടി വന്നു
ഇരുപതു ലക്ഷം -
നടുമുറ്റത്ത് മറ്റൊരു വീടുയർന്നു
ബാല്യം പുരക്കകത്തൊതുങ്ങി .