മഴക്കൈകൾ

ചിറകടികളുടെ ശബ്ദമല്ലേ 
ആ കേൾക്കുന്നത് 
അവർ കൊത്തിയെടുത്ത് 
പറക്കുന്നത് എന്നെ മാത്രമല്ലല്ലോ 
എന്റെ പൂവണിയാത്ത 
മോഹങ്ങളെക്കൂടിയല്ലേ
കാതുകൾ കൂർപ്പിക്കൂ
അവർ ഇറുക്കിപ്പിടിച്ചിരിക്കുന്ന
നഖ മുനകൾക്കുള്ളിൽ
മോഹങ്ങൾ
സംസാരിക്കുന്നത് കേൾക്കാം
ഇനിയൊരു മടക്കമില്ലാത്തവണ്ണം
അനന്തതയിലേക്കുള്ള
യാത്രക്കിടയിലെ അവസാന
സംസാരത്തിലാണവർ
നിറങ്ങൾ ഒലിച്ച് പോയൊരു
ചിത്രത്തിൽനിന്നവർ
ഇറങ്ങിയോടാൻ മോഹിച്ചിരുന്നെന്ന്
മന്ത്രിക്കുന്നത് കേൾക്കുന്നില്ലേ
ചായങ്ങളും നിറക്കൂട്ടുകളും
ചമല്‍ക്കാരങ്ങളും
അംഗലാവണ്യങ്ങളും
അഴകും സൌന്ദര്യവും
മോഹവലയങ്ങൾ
തീർത്ത മനോഹര ചിത്രങ്ങൾ
നാമെത്ര പ്രണയിച്ചിരുന്നു
ഇന്നിതാ
അഭിലാഷങ്ങളെ വേർപെടുത്തി
നിറങ്ങൾ പറന്നുയരുന്നു
ഇനിയേത് വൻകരകളിൽ
പെയ്തിറങ്ങാൻ
അലയുകയാണവരൊരു
മഴക്കാട് തേടി
ബാലികേറാ മലകളല്ലോ
നമുക്ക് ചുറ്റും
സ്വയം സീൽക്കാരങ്ങളിൽ
അവർ മന്ത്രിച്ചതിതായിരുന്നോ
കവിഞ്ഞൊഴുകുന്നൊരു
കരയെനോക്കി
ആഴ്ന്ന് താഴുന്നൊരു
ചുഴിയെ നോക്കി
ഇനിയും
വെറുതെ മന്ദഹസിക്കുന്നതിലെന്തു കാര്യം
എന്റെ മഴക്കൈകൾ നീട്ടി
ഞാനൊന്ന് തലോടട്ടെ നിന്നെ
പൂമൊട്ടുകൾ വിരിയിച്ച്
നീ മറുപടി പറയൂ
നമുക്കീ നിശ്ശബ്ദതയിലൊരു
നൃത്തം ചവിട്ടാം.